ازي تخلي الدولار يجري وراك

في يوم من الأيام وبعد تحرير سعر الصرف قرر مجموعة من جهابزة الانترنت الله يديهم الصحة إنهم يحلوا لنا المشكلة في بوست واحد.. بوست محتواه بيقولك اوعي تقلق.. قوم  طور نفسك ومهاراتك، اتعلم كل الشغلانات الفريلانسينج، اعمل حساب على مواقع كذا وكذا وساعتها مش انت اللي هتجري ورا الدولار، لأ ده الدولار هو اللي هيجري وراك..وهنا ومن موقعي هذا كفرهودة عملت في مجالات العمل الحر على الانترنت، وكفرهودة في الحياة عموما..دعوني افترض النية الطيبة عند الناس دي، لكن من مصارين الواقع خلوني افكر معاكم بصوت عالي

ما تبسطهاش

اكيد في شغل كتير متاح على الانترنت للفريلانسر في المجالات المختلفة وممكن يكون بالدولار او عملات عالية، لكن يا عزيزي المواطن، العثور على عميل مناسب يدفع لك بالدولار له شروط، اولها ان يكون لك خبرة طويلة في المجال، ثانيا ماحدش هياخد بالدولار إلا بعد شروط صارمة،  العميل بيكون عايز يحلبك زي الجاموسة العُشرعلشان ياخد منك أعلى شغل بأقل من السعر الحقيقي في بلده..وشقط ثري عربي في شارع جامعة الدول أسهل من العثور على عميل ملتزم يدفع بالدولار ويقبل بيك في مرحلة مبتدئة أو متوسطة

ما تكلكعهاش

السؤال التاني، هل كل الناس اللي مؤهلة للعمل الحر عبر الإنترنت؟ أكيد لأ، ناس كتير قضت فترة طويلة من أعمارها في أشغال نظامية بدخل ثابت، وغالبا شغلها بيخلص بعد الساعة 5 او  6 او سبعة..فهل فيه اي شيء قانوني أو منطقي في الحياة يخلينا نطلع نقولهم بعد يوم من العمل المهلك قوم اسعى.. اتعلم.. خد كورسات، ونقولها بنبرة تحسس اللي بيقرأ انه مش كفاية، ان الواقع كويس وحلو والعالم عادل بس هو اللي مش بيبذل مجهود كفاية علشان يلحق السبق؟؟

ولو سألت أي فريلانسر هيقولك انه شغال على مشروع او اتنين علشان يضمن لنفسه دخل اضافى، لما بيقبل اكتر من طاقته يا اما بيطلع شغل مش مناسب او بيبقبل باسعار اقل، وطول الوقت مطلوب منه يجري يجري علشان يجيب عميل، يجري علشان يطور نفسه، يجري علشان يهيء كل ظروف العمل، يعني أي حد لو بيشتغل في شركة واللاب الخاص بيه باظ الشركة مسؤولة تجيبه، الفريلانسر لأ، بيبقى عايز يجيب فلوس علشان يجيب لاب أو يصلح لابتوب يجيبله فلوس.. وهنا نتسائل هل حياة الواحد ناقصة كلكعة؟ ناقصة مزيد من التعب؟ ناقصة مزيد من الارهاق

خليك واقعي

طيب هل معنى ده اني عايزة ماحدش يتحرك ويسعى لتحريك حياته، أكيد لأ، ربنا خلق الانسان من يومه للسعي لرزقه ولتطوير نفسه، لكن انا كل مشكلتي مع اطلاق الدعاوي البراقة اللي تحسس الكل إن الطريق سهل بس انت اللي مش عايز، أو تحسس الشخص اللي ماشي وعلى ضهره شنطة تقيلة انه مش بيطور نفسه بالدرجة المطلوبة علشان يلحق، وكأن مطلوب مننا اننا نكون في صراع لتحسين حياة مش هنقدر نعيشها لأننا طول الوقت بنجري

 وطول الوقت في ناس بتتفزلك وبتلوح من بعيد بأحلام مش حقيقية، زي ان الدولار موجود وانت اللي مكسل، علشان ياخدوا تعليقات وتفاعل يحسس الناس التانية انهم بيقولوا كلام مهم وانهم وصلوا لسر طاقية الاخفاء

للأسف الحياة صعبة وللأسف كلنا بنحاول نحافظ على الخط اللي واقفين عليه، علشان كده احنا محتاجين ناس عايشة معانا على الارض وبتتكلم بصراحة عن سوق كلنا مدركين عيوبه ومميزاته، وناس تكون فاهمة انك زي ما مطلوب تطور ذاتك العملية فانت من حقك تكون انسان قادر يلاقي وقت لنفسه وعيلته ولموسيقته ولروقانه، واننا لازم نفكر في تشكيل الكون علشان يكون مناسب لحياتنا كبني آدمين مش آلات كل يوم بتنساق علشان تعمل بطاقة أكبر من طاقتها مليون مرة… وفي نفس الوقت لو عندك طريقة لتحسين الحياة اطرحها بكل جوانبها، لكن مش باسلوب بياع البطيخة اللي ماشي يقول حمار في حلاوة واللي يتدبس فيها يلاقيها قرعة..وهذا والله اعلم..واتمسوا بالخير

للمزيد: ليه تكون إنسان واحد لما ممكن تكون إنسان كومبو