ازي مزاجك

عزيزي المفرهد

روقان..ازي مزاجك النهاردة إن شالله يكون عال العال…أكيد طبعا مستغرب إني بسألك عن مزاجك في عالم خالي من الأمزجة واللحظات الرايقة؟..عشان كده خليني أقولك على أكبر سبب من أسباب الفرهدة ألا وهو إن ما بقاش في حد عايش لمزاجه، بقى في حاجات كتير احنا عايشين لمزاجها هي .وبقينا نضيع شوية تفاصيل كانت هي التفاصيل المنقذة عزيزي المفرهد

حياتنا شريط متكرر ومشاهد عبثية من غير معنى ثابت جوانا أو مفهوم. كل يوم الصبح بنقوم مفزوعين على مزاج المنبه ونلبس على مزاج آخر موضة وناكل على مزاج آخر عرض لأكل سريع من غير نكهة ونشتغل على مزاج أكبر فرصة وفي آخر اليوم مش بنلاقي إجابة تقولنا هو احنا اتعلقنا في الساقية دي عشان احنا بنحبها ولا عشان دي الساقية اللي المفروض الكوكب كله يدور وراها..لكن لأن المنبه بيرن اسرع من السؤال بنجري ونتعلق فيها تاني..في النهاية بننسى احنا مزاجنا إيه بننسى إحنا أصلا بنحب إيه..

البحث عن الروقان

ولأننا مش بنلاقي معنى مش بيبقى قدامنا غير إننا ناخد الدنيا غصب و نشيل في شنطتنا اكتر حاجات واتقل حاجات عشان نرضي كل شيء..لكن هل فعلا ده بيرضينا احنا..بلاش نجاوب دلوقتي السؤال محتاج قعدات طويلة مع النفس، بس المهم إن القاعدة تكون بمزاج.

مش بس كده، الدنيا كلها لازم تتفهم بمزاج، وتتعاش بمزاج..الدنيا زي البنت الجميلة النادرة عايزة الكلام الهادي والحوار الدافي والكلمة الصادقة. عايزة تقعد معاها وتسألها تحبها ازاي عشان توريك بعدها ازي هتحبك، تسألها عن سرها فتساعدك تعرف سرك..الدنيا عايزة تقرب من صوتها اللي جواك مش الأصوات المزعجة اللي قاعدة كل يوم تجبرك تعيش على مزاجها.

سوف يأتي الروقان في تلك الساعة التي تبدأ فيها التركيز مع التفاصيل. مع فنجان قهوتك والضوء اللي جاي من بعيد لجار سهران زيك.. وحبيبة بتديك من قلبها الدفا والأمان أكتر ما بتطلب منك.. وكتاب تشم أوراقه فتفهم معانيه وطريق تفضل تركز كل يوم في خطواتك فيه…وتختار طريقة مشيك أو حتى جريك.. حسيبك دلوقتي انا وأسيبك مع مزاجكك..لكن ده حينسيني أقولك

للمزيد:https://almudawana.com/936-2/

عزيزي المفرهد

في هذه الحلقة نكتشف إن العالم فرهد لأن مافيش حد عايش علشان يدلع مزاجه..

تابعونا على: المفرهدين