أولاً خلينا نقول إن الأفورة جابتنا ورا. فكونك إنك تعظم من الحدث كإن هو أندر حدث في الكوكب وكونك تبصله على إنه وحش تماماً فاحنا كده برة المنطق. بس خلينا نبص على حبة حاجات حلوة الأول.
- في حبة تفاصيل حلوة في التصميمات الديكورات الحركة التنظيم. وكل ده ممكن يقولنا إن البلد مش عاجزة إنها تعمل حدث كبير. وان الناس اللى فيها مش أغبياء ولهم قدرات عالية لكن لو اتوفرت لهم الإمكانيات.
- الموسيقى أعظم حاجة حصلت فعليا. وده يخلينا نسأل سؤال هو احنا لو عايزين موسيقى مصرية أصيلة من غير أي مؤثرات نجيبها منين. لكن كان حيبقى حلو لو حاولوا يفهمونا الكلمات عبارة عن إيه.
- الاخراج لطيف والصورة حلوة. والمتحف حلو وكل الحاجات دي كفيلة إنها تحطنا قدام شيء قيم بيتم تقديمه للعالم.
- فيلم خالد النبوي شيء حلو ويحترم وتجربة تستحق التقدير في الحيز الخاص بها.
اتبسطوا خلاص..تعالوا نبص للجانب التاني من الصورة
جانب ثاني من المشهد
- أولا أحنا محبوسين في الكلاشيهات حرفيا وده واضح قوي في كلمة الفنانين اللى ملهاش أي تلاتين لازمة. الكلام عن مصر الحضارة مصر الاصالة ده بقى مستهلك. يعني اللى كتب السكريبت كان تعب نفسه شوية وسمع الصوت والضوء وقرا أي نصوص فرعونية كان ممكن يكتب حاجة انضف من كده بكتير.
- ثانيا إيه الفكرة من احتفال إنك بتنقل مومياوات من متحف لمتحف. الحدث مش ضخم ومش شايفة إن له قيمة. المجهود ده لو اتعمل مع كشف أثري جديد للعالم كان حيبقى فخم قوي.
- حتى لو اعتبرنا إنك عملت الحدث ده كدعاية للمتحف. فالموكب مش هو الدعاية. الناس محتاجة تشعر بالغموض والأسرار وان في حقبة زمنية مختلفة حيدخلوا جواها مع المومياوات.. في رأيي إن كان أفضل حاجة وجودها في مقابرها الحقيقية وجوها الحقيقي. وعندنا قطع آثرية بالآلاف ممكن تعمل متاحف على مستوى عالى جدا.
- الحدث خالى من المصريين. خالى من تفاعل الناس معاه. وخلينا نعترف إن الناس لو كانت موجودة ماكنش التفاعل حيكون بالشكل اللى احنا حبينه يطلع. وده يخلينا محتاجين نطرح أسئلة كثيرة حوالين علاقتنا بالتاريخ.
- لو انت معترض على أي حد مش قادر يتفاعل مع الحدث وهوبااا يشعر مرة واحدة أنه دي أعظم حاجة بتحصل فاعذره. الحد ده بيفكر طالما يعنى انتوا معاكوا فلوس تعمل كل ده طب ليه النظام والشياكة والرقي مش بيظهروا في اصلاح المؤسسات المتهالكة. ليه مافيش تعامل زي ده مع القطاع الصحي مثلا والعظمة دي مش بتتقدم ليه للأطباء اللى اتفشخوا حرفيا من الكرونا. ليه مش بتطبق في سيستم الامتحانات اللى واقع على طول.. طب ياخويا طالما بتعرف تنظم ما تعمم التجربة.
- أنا منبهرة جدا بتواجد المرأة جوة الحدث في أكثر من مشهد. بس برضه كان فيه عازفين رجالة ما تمش التركيز عليهم. وده يخلينا نركز على إننا محتاجين نكون فاهمين مش حافظين.
الخلاصة
- في بقى حاجة تانية خالص وهي علاقتنا بالتاريخ عاملة ازي؟ الاجابة تكمن في جملة قريتها لحد مش فاكرة اسمه قال “يبدو أن التاريخ يتيم”..بس ده هنحكي فيه في يوم آخر ..اتمسوا بالخير.
اقرأ أيضا: لماذا قالوا أن التاريخ يتيم؟
